華沙中央火車站(Warsaw Centralna)
呢個係華沙中央火車站(Warsaw Centralna), 絕大部分係波蘭嘅中央站都係叫 乜乜Centralna 或者 乜乜Glowny。如果你想去波蘭其他週邊城市, 例如克拉科夫(Krakow)、羅茲(Lodz)、 樂斯拉夫 (Wroclaw)......喺呢度大概搭兩至四個鐘頭可以去到呢啲週邊城市 (P.S: 如果你有興趣嘅話,可以留意之後篇章)波蘭真係好多嘢發掘㗎,個個城市都有佢嘅特色 。如果嚟波蘭嘅話,唔好淨係嚟幾日呀!
華沙中央火車站(Warsaw Centralna)啱啱喺正華沙中心,附近有地鐵、的士站,超級方便!
火車站好容易就見到panel
火車站好容易就見到panel, panel有分arrival同departure。 如果你係出發去一個地方, 記住睇departure, check下時間(最左手邊)同埋去邊個月台等車(最右手面), 月台嘅左手邊嗰行係話畀你知經過邊啲地方。呢塊板嘅第二個功能就係話畀你聽delay,啲車成日都會delay, 我試過喺個火車站delay咗兩個鐘。 我喺波蘭搭得最多嘅係IC同埋KD呢兩間火車公司,買火車飛係非常之彈性,你可以選擇去Ticket office (佢哋叫做 Kasa),不過通常都要排幾耐隊,同埋有一啲老職員未必識講英文;又或者可以早好多上網用信用卡買飛(intercity.pl/en/)確保你一定有位; 又或者當你見到好快有車,可以即場上到車見到啲職員先買飛都得,我搭咗咁多次次次都有職員嚟check飛,唔好諗住逃票! 如果你上到車搵唔到職員,可以等查票嘅時候主動同佢講你想買飛!
價錢 與 Reduced ticket
好可惜波蘭IC & KD嘅火車係唔承認International Student Card,乖乖地買返正常票!Reduced ticket 淨係畀當地有波蘭學生證嘅波蘭學生買嘅啫!不過其實一張飛都唔會好貴,都係一兩百蚊港紙左右,點都平過買內陸機!搭火車方便過搭飛機!
IC 火車
望一望格火車去邊,同埋係咩顏色,唔好上錯車!當你上咗車,無論係k d或者係ic都好,有啲人會跟返張飛嘅座位坐,但係有好多時候啲人都好隨便,亂坐啦!有啲車廂係compartment,即係大家面對面望住大家坐咁,一程車都坐幾耐,可以大家交流下,咁都唔錯㗎!
KD 火車
有啲KD火車入面係有廁所!可以畀你用wi-fi!雖然KD貴少少,但係我鍾意KD多啲!有啲攜帶大型行李嘅人好似我咁, 佢哋有個行李架喺火車卡與卡中間,不過冇人睇住㗎! 雖然我喺成個過程都冇畀人偷過嘢,但係我都建議買番個lock同埋條繩圍住個架同埋個喼(PS之前行開深水埗買),咁你行開坐嘅時候都會安心啲!
火車站內
火車站入面其實仲有一啲細舖頭可以行下, 有咖啡店、麵包鋪...... 但係廁所就要畀錢,大概三蚊波蘭幣。
火車月台
火車月台的迷思
雖然呢張相唔喺華沙影嘅,呢張係一個波蘭小鎮影嘅,但係想話畀大家聽唔係所有波蘭火車站嘅月台都有𨋢搭,如果你係抽住喼嘅話,可能你要搵人幫下你手抬個喼上月台!我嗰陣時就成日要麻煩人哋,真係超級唔好意思!雖然嗰度啲人真心好人,問親個個都願意幫忙,我個喼接近有30kg,真係好彩遇上嘅都係好人!所以我強烈建議大家最好遊東歐嘅話,唔好帶喼,最好都係背包,咁你去好多地方都好方便呀!
請大家支持我的頻道,按贊留言分享🙏🏻謝謝你~~~~~
追隨我的Youtube▶https://youtu.be/P6BtM4cj6q4
追隨我的Facebook ▶ https://www.facebook.com/travelwithsunflowerc/
追隨我的Pixnet▶http://melsunflower.pixnet.net/blog?utm_source=PIXNET&utm_medium=navbar&utm_term=my_blog
追隨我的Instagram ▶ https://www.instagram.com/mssunflowerc/?hl=zh-hk
THANK YOU
若想知道更多關於 波蘭華沙 唱錢攻略 Kantor Rotunda, 請按這裏。
若想知道更多關於華沙最大的公園: Lazienki park 瓦津基公園, 請按這裏。
若想知道更多關於 華沙WetMarket: Hala Mirowska (米羅夫斯基廳) 及 波蘭溝通小貼士, 請按這裏。
若想知道更多關於美食情報篇-波蘭傳統美食-五款必吃主食, 請按這裏。
若想知道更多關於美食情報篇- 波蘭小吃甜品-五款必吃Lody, Pączki...... , 請按這裏。